杜德偉插警無能港人枉死

杜德偉（Alex）父親為西班牙裔菲律賓人，昨日剛從台灣來港，Alex表示全家人在家中收看電視直播，十分憂心，他謂：「聽到有人質罹難，真係難以置信，會幫佢哋祈禱。（有人質被救出？）好慶幸有生還者，之前有報道話人質死晒，真係嚇死人，呢啲嘢唔可以亂講，人質家屬睇到真係會嚇死，如果我係家屬一定會暈低。」Alex表示自己少去菲律賓，不清楚當地治安問題：「嗰邊仲有親戚，會打畀佢哋聯絡。依家唔係治安問題，而係有個革職警察報復發洩，全世界都可能有機會發生，所以好大鑊，今次牽涉到香港人，好擔心，會幫死傷者祈禱。」

林峯關心當地親友

談到菲律賓警方拯救行動緩慢，Alex忍不住連珠炮轟：「警方應該快啲救人，佢哋行動太慢、太怕事、太冇計劃，點可能用繩拉開車門？佢哋成班警察，對住一個人，有人質死咗真係好唔抵，連直升機都冇，應該搬兩盞大光燈照住架旅遊巴都好，點可能掟螢光棒入去？都冇用嘅！」他又引述其父對事件感遺憾：「爹哋睇到菲律賓警方失職，處事無能，冇效率，好失望。」

而林峯昨晚雖然要開工，但亦有留意事件，他透露現時亦有親戚居住菲律賓，對事件感到震驚：「有時間我都打電話去問吓佢哋（親戚）情況。（當地治安好差？）咁治安又唔係好差，但佢哋對槍械監管就差啲，一啲看更同保安都有槍。」對於有團友傷亡，林峯說：「希望唔係事實！」

JC震驚高呼恐怖

至於擁有菲籍血統的Jessica C.，形容事件恐怖，她難過說：「今日出咗去，冇睇新聞直擊，經理人話我知嘅時候，真係好震驚，好恐怖，冇諗過開心度假會變咗傷心事，好擔心獲釋嘅小朋友，因為佢哋嘅家人唔知乜情況。我媽咪係中菲混血兒，喺當地長大，我都識講少少菲律賓話，對呢個地方有歸屬感，今年3月先返去探親。由細到大，媽咪都話當地治安唔係太好，嗰度啲人好窮，所以罪案會多啲，佢教我要小心，唔好衣着光鮮。」

另外，兩岸三地藝人對事件極度關注，在微博留言為死傷者祝禱，但同時亦狂轟菲律賓警方救援行動緩慢。梁漢文激憤得在微博上爆粗，後知不該立即刪掉。郭羨妮在微博謂在直播中聽到笑聲，怒斥過分可恥。

文：專案組