GiGi唔恨結婚只求有Fun
情場上屢敗屢戰的梁詠琪（GiGi），在事業上愈戰愈勇！GiGi已達有事業無愛情的「敗犬」之齡，但她對感情事抱隨緣態度，亦未有恨嫁的心。她與戀人相處但求愉快開心，甚至比一紙婚書更重要。
自與法籍男友Sly甩拖後，GiGi將全副精神放在事業，炮製全新專輯《怕寂寞的貓》。雖說「怕寂寞」，但現實生活中的GiGi一點也不愁寂寞。
否認宅女 需要寂寞
GiGi說：「未有任何歌曲之前，已經構思呢個碟名，希望用呢隻碟畀大家認識我。我發現屋企啲貓雖然好cool同好高竇，因為先入為主，但其實佢哋好熱情同黐身。正如有啲人未認識我之前，覺得我好cool，識落咗又係另一種感覺。（你寂寞？）創作時係需要寂寞，但我鍾意熱鬧同旅行，又鍾意食飯時好多人，我天生唔係『宅女』，依家我唔寂寞，因為有好close嘅家人，媽咪搬咗喺隔籬屋，方便照應。」
回顧GiGi的情史不算多，但段段戀情也相當轟動。事實上GiGi情路絕不平坦，剛剛才與法籍男友分手，雖然火速從情傷中復原，但有否膽量再發展異地戀？她說：「唔知呀，真係遇到先講啦。之前已經過咗去，唔好提咁多。人生流流長，有好多過客，合則來不合則去，分手可以維持良好關係，分手都可以好和平，唔需要太激動。」身經百戰的GiGi，處事愈來愈成熟。
回復單身貴族的GiGi，已達卅四歲「敗犬」之齡，亦達外界認為的適婚年齡，大部分女士也渴望擁有美滿的童話式婚姻，問到有否結婚衝動？她說：「不嬲都冇，自細父母離異，我成日覺得只要兩個人開心同相處愉快，仲緊要過一紙婚書。」GiGi表示雖然現時沒有男友，但正常社交一定有。問到有否追求者？她說：「情侶一定要由朋友開始，但要了解多啲先得。」再問到會否做主動？她說：「我會主動做朋友先，呢啲要順其自然，唔可以太急。」
好友相陪 弄貓為樂
雖然沒有愛情滋潤，但GiGi仍有家人及好友相陪，加上弄貓為樂，令她毫不寂寞。她謂：「有啲朋友識咗十幾年，佢哋好照顧我。」在圈中人緣不俗的GiGi，與楊采妮、許茹芸、莫文蔚及李心潔情同姊妹。她稱：「我哋可以約埋一齊去旅行，大家雖然係同行，但從來冇任何比較同猜忌，反而係互相鼓勵，對工作態度一致，我會好好珍惜佢哋嘅友情。」
採訪：專案組
攝影：吳文聰
化妝：Johnathan Y.@make360.com.hk
髮型：Keith Wong@Orient4.com.hk
服裝：TSUMORI CHISATO FW10 by I.T
場地：Cucina@Marco Polo Hongkong Hotel