泳兒實力爭勝降Cup鬥JC
當不少o靚模都力谷事業線博上位之際，警鐘胸模Jessica C.與泳兒兩位有料之人卻異口同聲表示喜歡結實身形，即使做運動以致胸部跌Cup大縮水都不介意。而泳兒與洪卓立在活動後即趕下檔，出席英皇新秀大賽面試。
Jessica C.（JC）、泳兒及洪卓立昨日為新都會廣場的星級潮遊派對擔任嘉賓，洪卓立由三個model伴上台，即時硬晒軚企定定。而Jessica與泳兒齊齊以背心熱褲上陣，不過泳兒在背心內打底，相比起穿露臍背心大騷小蠻腰的Jessica，就顯得略為密實。
Keep住24吋腰
Jessica表示她的腰圍是24吋，她說：「我依家想結實啲，鍾意啲結實嘅身形，以前我就鍾意纖瘦啲。」說罷即展示身上的肌肉，並續說：「我會食好多蛋白質同狂做sit up。（你點keep住24吋腰？）早餐前做sit up，加速新陳代謝。呢排拍戲成日要打排球，我想拍完都keep住打，因為平時做model好少時間做運動。除咗打排球，我都會跑步。（跑步會令個胸變平喎？）其實全身都會減磅，我唔介意。」
羨慕魔鬼身材
同場的泳兒被問可會擔心外界拿她跟Jessica比較，她大方地說：「一定有比較啦，自己好羨慕佢嘅身材，佢係真正嘅魔鬼身材，腰好幼上圍又豐滿，我會用欣賞角度睇，如果我係男士都會流鼻血。（做咩今日咁密實？）之前出活動都着過Deep V，想收埋先，唔想長期暴露出嚟，會怕醜。（唔騷吓條事業線？）搵個適合嘅機會先，我依家練緊舞，遲啲畀驚喜大家。」
泳兒又透露最近勤做Gym瘦五磅，現在只有八十多磅，身邊朋友都覺得她胸部縮水，她卻不介意：「我想結實啲，唔介意全身減磅，太大負荷都係障礙，輕盈些跳舞更好。（個胸縮水喎？）唔介意，我又唔係sell呢啲。」
Jessica C.
年齡：22歲
三圍：33C-24-35
身高：170cm
體重：50kg
撒手鐧：警鐘胸
泳兒
年齡：27歲
三圍：34D-23-33
身高：162cm
體重：40kg
撒手鐧：靚聲
文：名人組