戴辛尉踢爆家姐作主

「戴思聰老師治喪委員會」前晚向各大傳媒發表聲明指為免混亂及尷尬，拒絕鄭嘉穎出席喪禮，而昨日事件有戲劇性發展，戴思聰幼女葳葳接受查小欣《巴巴閉邊個夠我查篤撐》節目訪問時，重申師母歡迎對方參與喪禮：「我同媽咪都係記者打畀我問先知道有呢個聲明，我明白爸爸離世令到家姐（戴蘊慧）情緒好不安、好不穩，加上好多事情要去搞，咁混亂情況之下令家姐做出一個急躁決定。」

只要誠心都會歡迎

記者問她何事刺激真真？葳葳說：「爸爸生前有段時間好唔開心，令到佢自己同家人都好辛苦，可能家姐不忿，要為爸爸出氣，搵番個公道。（歡迎嘉穎到場？）媽咪認為爸爸生前所有好友、親戚同埋學生，只要係誠心都會歡迎。」葳葳表示爸爸出事前，媽咪剛接受大手術，所以一直非常擔心媽咪身體情況，幸好暫時她已平復心情。

本報致電戴蘊慧求證，她稱發表聲明是治喪委員會的決定：「唔想畀是是非非影響喪禮，如果嘉穎想拜祭爸爸，可以打畀我或者葳葳，（話你不忿？）我冇不忿，冇怨氣，雖然同嘉穎冇聯絡，但大家有共識，只係想爸爸平安上路。嘉穎係爸爸生前好錫嘅學生，唔係我唔畀佢嚟，亦唔係針對某一個人，只係唔想破壞喪禮氣氛。」

嘉穎昨在電視城談到戴老師時一臉肅穆。

戴思聰妻子對丈夫突然過世已平復心情。

嘉穎：我都有啲混亂

嘉穎昨日下午到電視城拍劇，對於葳葳重新歡迎他出席喪禮，他神情肅穆說：「其實自己都有啲混亂，但如果佢家屬任何一個人覺得我唔適合出現，我會搵過另一個時間去，我唔希望喪禮焦點放喺另一啲事上面，希望老師一路好走，唔想更多炒作。（你同蘊慧有恩怨？）唔清楚，要講嘅已經講晒，大家睇番06年嘅新聞。」他表示喪禮當日會送上花牌致哀。

據知，因老師晚年視力衰退，睇報紙都慣用放大鏡，故戴家準備放大鏡及老師生前最愛的戒指做陪葬禮物。至於今日是戴思聰的頭七，戴家將準備為他進行拜祭儀式。

採訪：音樂組