滕麗名想掟監製落水

滕麗名、張可頤、馬德鐘及陳自瑤等昨日於酒店泳池為劇集《女人最痛》宣傳。阿滕被馬德鐘推翻浮艇跌落水後，便走去推劉俐落水，事後她謂：「唔爭在啦！橫掂都係死，之前拍呢套劇要黐假鼻，胸又要吊水袋，搞到條頸瘀晒，監製試吓行近啲，乜嘢仇我都要報呀！」張可頤雖然有工作而沒有落水，但都衣衫盡濕，她謂：「冇諗過咁激，淨係話美艷沙灘妝，我算好，收視未夠40點就着三點式，（歐陽震華話收視好裸跑？）我攞定長鏡。」遊戲前見可頤食藥，她表示因唔夠瞓頭痛，更透露之前與男友到法國參觀酒莊，飲了不少靚酒，問她何時結婚？她笑言順其自然。