楊梓瑤反駁：踩場冇犯規
「浸大E神」楊梓瑤（Carol）昨應邀出席西九龍中心舉辦的「一番巿集」及Gameone網絡遊戲比賽揭幕禮，與半裸男模同場玩遊戲，又送香吻給女參賽者。
對於寫真集被指意識不良，相中大特寫一撻白色液體，Carol辯稱：「無意識不良，嗰撻漬係太陽油，咁曬搽太陽油好正常，至於食唧唧冰係童年回憶。」舊八模A. Lin指她踩入書展應記大過，她反寸對方：「中學先有記大過，我讀副學士唔會有。我都冇犯規，大會冇話唔畀我入書展。」
另外，Carol今天將到電台與學者答辯，她坦言心情緊張：「人哋係學者，我身份較尷尬，我會聽清楚問題，逐句答，公司會有人陪我。（怕唔怕好似周秀娜咁被指回答空泛？）都怕，我始終係一個未讀完書嘅學生，我會用真誠去答，唔可以控制人哋講乜，就算鬧我都冇辦法。」