周秀娜變招入書展 推出純文字Copybook
周秀娜、新八模、A.Lin、DaDa、Annie G.及Hailey C.全不獲准在書展搞寫真集簽名會後，即發動另一攻勢力挽狂瀾，推出純文字寫真集Copybook在書展售賣，並以推出Copybook名義申請在書展搞簽名會。周秀娜的Copybook中的文字應景又抵死，為「我要每年入書展辦簽名會」、「我樂於協助出版商推廣寫真」以及「書展是一個老少咸宜、形象健康的文化平台」。
周秀娜接受電話訪問，被問到是否出Copybook作無聲抗議，她說：「唔係！其實喺書展搞簽名會係我哋嘅目標，今次係以文會友，哈！（大會批准申請未？）預計明日前會有回覆，我都等緊。（文字自度？）之前喺facebook開咗個群組，係fans對書展嘅心聲，我都有畀意見。（如果唔批准？）到時先算。（如到時有fans拎寫真畀你簽名？）fans咁辛苦支持我哋，點都歡迎。」對於Copybook中「入書展」的「入」字看似「人」字，經理人Roy解釋冇寫錯字，「係字體效果問題，印數攞個吉祥數字，會印888本。」
