Debby任撕暴婦團強烈譴責
o靚模寫真愈玩愈激，「翻版徐子淇」Debby自製「撕」暴片放上網惹來全城關注，昨日婦女團體強烈譴責事件，認為是貶低女性尊嚴，而林莉亦睇唔過眼狂鬧，Debby見事態嚴重即急急認錯！
「翻版徐子淇」Debby（曾麗儀）與另外四位o靚模以日本「妄攝」概念推出寫真集，怎料一段短短39秒的自製街頭「撕」暴片段，竟惹來連串風波。昨日香港婦女中心協會發聲明強烈譴責以性暴力手法來宣傳少女模特兒的寫真集，該會總幹事廖珮珊表示：「片段的場景真實，容易對女性造成心理威脅，完全冇意識到這消費性暴力行為，可能會對社會產生壞影響。」該會希望能依法例將片段列為不雅物品，阻止繼續流傳。而婦女權益關注團體召集人伍婉婷亦說：「事件令人覺得個女仔好隨便，究竟佢底線去到邊？咁做連佢自身安全都有影響。」
兩參展商上訴得直
成為眾矢之的，Debby承認無想過有咁大回響，現知事態嚴重亦知衰認低威，她說：「其實拍呢條片真係冇意思教壞人，只係個concept配合番寫真，而且都係製作人去諗，拍呢條片真係想多人留意，依家都算做到，但冇諗過有咁大回響。如果引起不必要嘅誤會，真係唔好意思！」
早前貿發局為「淨化」書展，下令所有o靚模禁足搞簽名活動，但昨日該局發言人透露，有十間參展商提出上訴，其中兩間因願意更改簽名會的書本或作者，符合書展老幼咸宜及鼓勵閱讀風氣的宗旨，貿發局同意讓有關展商繼續舉行簽名會。
林莉密謀另類宣傳
今年亦有份推出寫真集的林莉認同貿發局做法，她說：「好明白點解大會會唔畀，始終書展應該留番畀鍾意睇書嘅人去，我會用另一種宣傳方法，打算20日去一個同自己有密切關係嘅地方搞發布會。」對於有o靚模自拍施暴短片宣傳，她認為手法過於激進，擔心對小朋友有影響。
文：專案組