側田報喜娶韓妹

側田昨日為新專輯《愛的習慣》舉行簽名會，吸引近百歌迷支持，由於側田七月一日三十四歲生日，獲小歌迷送香吻及蛋糕，側田亦禮尚往來反錫小歌迷，令部分歌迷呷醋𠵱嘩鬼叫，側田透露生日會飛往美國探母親及親友，並表示生日願望盡快成家立室。

蜜遊迪士尼

曾被拍得與韓妹遊迪士尼及行街Shopping的側田大方公開戀情，他說：「迪士尼嗰個就係女友。（會唔會帶埋佢返美國見家長？）唔會喇，咁遠，再認真啲先啦，只係見過媽咪一次。」側田解釋說：「今次返去美國有好多親戚，如果帶埋佢見即係結婚㗎喇，我好傳統。」

小妹妹送吻預祝牛一，側田甜入心。

側田首次承認和韓國女友蜜運中。

恭喜鄧紫棋

問到對方是否結婚對象？側田說：「好難答，答完會令對方有期望，之前承諾好多嘢都做唔到，所以依家唔會作出任何承諾，完成出年演唱會先。」對於緋聞女友鄧紫棋年底殺入紅館？側田說：「Good，恭喜，好嘢吖，犀利。（搵你做嘉賓？）可能佢嫌我老。」

採訪：音樂組