吳浩康中計生日驚喜
吳浩康（Deep）明天27歲生日，經理人Mani及高層吳雨為壽星仔製造驚喜，特別騙他回公司並送上生日蛋糕，令Deep既驚且喜，事後他表示：「Mani叫我上去話要簽糧單，但我明明聽日（即今日）都要上去，唔知點解公司講一句我就信，我冇諗過佢哋會同我慶祝生日！」
由於正日生日當天要在錄音室度過，所以Deep不會跟女友莊思敏慶祝，他自爆：「我要減肥呀，唔可以食生日蛋糕，我送畀自己嘅生日禮物係八舊腹肌，因為已經唔見咗十年！」Deep坦言生日願望是工作順利兼穩定，問到有否考慮成家立室？他說：「計劃吓，最緊要工作順利，睇定啲環境同時機，配合到就嚟！」