麟李命矜貴取消南非睇波

早前阿倫稱有友人送了四十多張的世界盃門票給他，不過他要為下月中舉行的演唱會做準備而未能成行。與阿倫同樣熱愛足球的李克勤表示，早知阿倫不會到南非睇波：「佢媽咪點會畀佢去呀！」克勤亦稱知道黃色警示後，家人即反對他到南非，他亦決定專心留港為電台講波。他謂：「睇波只係娛樂！我想呼籲大家去睇波嘅要小心。」

楊受成門票轉讓朋友

每屆都會親赴主辦國觀賞世界盃的英皇老闆楊受成，原本打算與太太、子女及兩對夫婦朋友遠赴南非睇波，但昨晚他決定取消有關行程，並已將原先購得的十二張門票轉讓朋友：「我哋啱啱決定唔去，見到南非治安咁差，真係令人好擔心，再加上黃色警示，我哋全部都唔去。」

雖然不少圈中人愛惜生命，但仍有膽大之人。勇字行頭的陳小春表示由於世界盃四年一度十分難得，故無論如何都會依照原定計劃七月初出發到當地睇波。他笑言有一套獨門應變妙方：「我計劃全程喬裝，戴假牙扮阿伯，全部污糟舊衫，爛身爛勢，盡醜盡臭盡核突，只會帶少少現金傍身，唔會帶電腦、相機，會用最舊最殘嗰款電話，偷咗都喊三聲嗰隻。」

阿倫有球票亦不去南非，安全第一。（資料圖片）	每屆世界盃，楊受成均有捧場。（資料圖片）	陳小春大無畏，如常到南非觀看賽事。（資料圖片）

陳百祥冒死欣賞賽事

向來牙擦的陳百祥，笑言原本亦會到南非睇波：「唉！呢啲自負盈虧啦！條命自己嘅，我自己可以決定自己，但我都會勸普通人唔好去。」但仍有意到當地觀賞賽事，更取笑臨時取消行程的阿倫：「梗係，佢條命矜貴，上有高堂，下有妻兒，所以佢啲飛落咗我度，我就膽正命平。」問到是否擔心治安問題？他謂：「香港都日日有打劫啦！世界盃四年一次，你去到咁多人嘅地方都畀人揀中嚟打劫，你都抵啦！」他又指原本打算組團與明星足球隊好友到南非睇波，不過直到目前仍未有人報名。

另外，名人趙金卿透露好友中田英壽前晚已出發往南非：「我尋晚同中田英壽喺香港食飯，佢即晚搭夜機去南非，主要為當地小朋友做嘢，同足球有關嘅。」她又指之前曾到南非旅遊：「有一次我坐熱氣球睇野生動物，點知降落一個地方後，個導遊就好緊張咁，恐防有賊匪打劫咁款。」

在南非結婚的Lisa S.則表示，黃色警示沒有影響她對當地治安信心：「我每次返南非都會直接返屋企，我屋企同城市距離好遠。南非一向畀我安靜、自然同舒服嘅感覺。」不過Lisa表示稍後會忙於籌備婚宴，短期內未有計劃再到南非。

文：影視組