李卓庭考演技騷女人味
李卓庭（ Eunix）日前一改男仔頭形象，戴上長假髮以吊帶短裙拍攝新歌MV，為配合歌曲更在鏡頭前拋眉弄眼盡騷女人味，Eunix笑言有模特兒潛質，可進軍模特兒界行騷賺多筆。
出道三年的李卓庭以短髮清爽Rock形象見稱，日前為配合新歌《美麗二線》改以女人味示人，穿上吊帶短裙及戴上長曲假髮拍攝新歌MV，導演要她一人分飾「Rock友」及「淑女」兩角，搞到Eunix精神錯亂說：「扮Rock友完全難唔倒我，因為平時我都係咁打扮，但叫我扮淑女就唔係幾自然。」
拋眉眼欠自然
Eunix自爆拍攝拋眉弄眼鏡頭，因欠缺自然而多次NG，她說：「平時都唔會咁做，一下子真係好難做得出，所以要NG好多次導演先收貨。（有冇試過電男仔？）梗係冇，之前拍拖都唔會咁做，一向男人頭，呼呼喝喝反而有囉！」甚少穿短裙的Eunix說：「其中有個鏡頭，導演開風扇吹住我，搞到條裙飛起，我梗係即刻用手按住，睇番條片個姿勢好似瑪麗蓮夢露。」
有模特兒潛質
Eunix更自讚有女人味說：「睇番啲相估唔到自己咁有女人味，有模特兒嘅潛質。（殺入模特兒界？）如果有人搵我行騷都幾好，多個賺錢機會，我又多啲經驗。」
文：音樂組