陳樂榣封胸貓樣撼o靚模
性感女子組合Freeze成員陳樂榣（Alley），今年捨棄推出性感寫真，反而推出貓兒繪本，在書展內與新進o靚模火併，務求殺出一條血路。
當眾o靚模頻以性感寫真，攻陷宅男荷包之際，性感女子組合Freeze成員陳樂榣卻大唱反調，推出貓兒繪本，務求突圍。她說：「入行嗰陣已經有呢個諗法，出本關於我同貓貓嘅書，以繪本形式教人點樣養貓、點樣同貓溝通及分享養貓心得，比較生動。」
Alley又自言是「貓癡」，家中養有六隻貓兒，採訪當天，她帶同英國短毛貓「細佬仔」，雖然「細佬仔」比較扭計，卻是繪本「男主角」，Alley說：「我有少少偏心佢，會錫佢多啲，因為最有感情，不過佢有『貓群恐懼症』，唔鍾意同咁多貓一齊。」問到是否殺出新血路？她說：「希望可以，依家諗定書展特別造型，但唔會低胸，我對銷量有信心，朋友都認為會有客路。」
感情一片空白
問到是否告別Freeze？Alley則說：「仲係嘅，我哋未拆夥，佢哋都知我出書。（依家唔行性感？）盡量避免，而且我不嬲係三個中最唔性感嗰位，無論樣貌、性格同身材都唔性感。」談及感情生活，Alley聲稱一片空白，她笑稱：「係青春期到依家最冷清一年。（好揀擇？）冇呀，最緊要心地好、溫柔同愛貓。（想疊埋心水做少奶奶？）唔係啦，依家想多啲喺藝術方面發展。」
採訪：專案組
攝影：劉智源
場地：湛山草堂