葉翠翠疑遭蠱惑印傭爆格
葉翠翠前日在微博自爆疑被印傭偷錢，並已報警求助，原來年初她首次請傭工時已中過招，她受訪時表示：「年初第一次請印傭，初時返工係好正常，但一個月之後就態度變晒，好似博炒咁，當時冇諗過係蠱惑招，賠錢賠機票畀佢走。期間發現佢有啲頸鏈嘅當票，咁啱我又唔見咗啲頸鏈。印傭仲借貴利畀人追數，好彩搬咗屋後冇受到滋擾。」
愈叫愈走
其後翠翠再經印傭公司轉介，聘請了另一印傭，豈料印傭第二天返工就出事，翠翠說：「印傭第二日突然話好辛苦要辭工，之後打畀間印傭公司，佢哋態度好差，叫我賠兩日人工同機票叫佢走。我覺得好冇道理，同印傭講如果要走就要賠一個月人工，佢話冇錢賠。我諗住息事寧人，唔使佢賠錢叫佢寫封辭職信就算，印傭話出去打電話就突然唔見咗人，老竇追出去佢就愈叫愈走。之後再打畀印傭公司話印傭已經走咗。」
報警求助
翠翠覺得事件疑點重重，決定報警求助，期間葉母發覺銀包少了幾千元，懷疑被印傭偷去，她說：「如果唔係身有屎，使乜愈叫愈走。」翠翠指發現媽媽除了現金損失外，部分金飾亦不翼而飛，她亦不見了一部相機，估計損失過萬，計劃再求助警方。
翠翠今次公開事件希望不會再有人「中招」，她說：「咁耐都冇請工人，原意希望父母可以輕鬆啲，但反而搞到佢哋唔開心。」據警察公共關係科表示，前日約五時半，西貢有一名姓朱女子報案指銀包內遺失了二千元現金，現列盜竊案處理。
文：影視組