郭子健靠盲公竹闖導演路

郭子健提到之前份工太苦悶，日日畫超市廣告，做到有點心灰，剛巧有朋友入了電影圈，他受感染亦去讀導演訓練班，當時導師是泰迪羅賓，之後並介紹他給葉偉信（小圖）做副導。初時跟葉偉信工作，他感覺不太好，全因葉偉信「好惡」，郭子健說：「我喺片場見到佢鬧人，當時覺得呢個o靚仔嘅年紀咪同我差唔多，憑咩咁惡？之後合作，發現同佢好夾，原來佢大我十年。」

等咗兩年零收入

郭子健除了跟葉偉信「好夾」外，對方還成為他的「盲公竹」，打開了導演之路，介紹他給曾志偉認識。郭子健說：「我見志偉時，佢問我有咩想法？我一噏就噏咗四個劇本，志偉喜歡其中一個，但我想拍《野。良犬》，之後都OK咗。」

對於新導演來說，一句OK，猶如沙漠遇「甘露」一樣，可惜，原來背後還要面對重重困難，郭子健說：「由OK到開拍，中間足足等咗兩年時間，我完全唔敢接其他工作，驚一接就會冇咗呢個機會，所以嗰兩年係零收入，呢樣嘢令我陷入瘋狂狀態，好彩當時葉偉信打電話畀我，話佢部《龍虎門》開，叫我做幕後，其實係搵個藉口等我有啲收入，點知志偉話畀我聽陳奕迅可以喇，我即刻返去搞《野。良犬》，好記得開機第一日，我唔覺得夢想成真，因為根本仲喺度發緊夢，當時自己真係好驚，我嘅朋友潘源良，send咗十二字真言畀我，同我講『重要的戲，不要放棄，靈活處理，萬勿鬥氣。』」

郭子健開心與陳奕迅合作拍《野。良犬》。 （資料圖片）

邵音音（左）憑《野。良犬》奪最佳女配角，眾人皆替她高興。 （資料圖片）

畀前輩發揮機會

過完一關又一關，披荊斬棘，郭子健終於完成《野。良犬》，更因此片獲提名金像獎最佳新進導演，而邵音音則入圍最佳女配角，結果，子健輸了，邵音音贏了，郭子健坦言自己拿不到獎項是「預咗」，因對手太強，所以沒有失望，反而戥邵音音奪獎開心，他知對方在圈中受了好多冤屈氣，有段時間冇人找她拍戲，現可藉這部電影告訴所有人「邵音音係得嘅」！

郭子健早前拍攝了一部以打擂台為題材的勵志電影，用了一班前輩演員當主角，其中當然有他的「愛將」邵音音，以及好打之人梁小龍、陳觀泰。子健指很多前輩演員都「好得」，只欠一個機會，他希望憑新戲把前輩的「真功夫」呈現給觀眾看。

文：影視組