江若琳投保百萬人疊人勁舞
江若琳（Elanne）昨晚為快歌《Babaya》拍MV，穿上露腰裝跳勁舞，大玩人肉金字塔、踩心口、飛背脊、倒掛金鈎等高難度危險動作，唱片公司特別為她買重百萬保險，以防寰宇一姐有任何損傷。
底衫褲全濕
跳足半日的Elanne氣喘喘說：「我帶咗3套底衫褲，底底都濕埋。（買重保險？）保額過百萬，練咗10幾日，依家隻腳唔似女仔腳，瘀晒。（排舞時有冇發生過意外？）試過踩到dancer個肚，對方攬住個肚喺地下典嚟典去。」
Elanne揚言今次挑戰體能極限，希望帶給fans驚喜：「有時跳舞用錯力，拉傷少少，唔使睇醫生，我平時好牛精，應該冇乜問題。」
泰國玩自閉
此外，Elanne昨午出席「太陽計劃」活動，她透露7月將到泰國拍戲，笑言會收埋自己喺酒店房，不是太擔心安全問題。她又表示會跟劉青雲合作，開心之餘亦感壓力，因對方是她的偶像。而她在戲中飾演精神病病人，為演好角色要多做功課準備。拍畢電影後，Elanne又會飛到北京拍一套內地劇，自認後生handle到。採訪：音樂組