諸葛公主知衰甘心被惡搞
向來被指有「公主病」的諸葛梓岐昨日出席拜神儀式，為自己日前在微博上載一張「盜錄」的《猛鬼街》銀幕照片火速道歉，笑言自己中了「微博毒」，一時興奮才做錯低能事，並指不介意被網友將她的頭key上《猛鬼街》男主角Freddy身上惡搞。
諸葛梓岐、薛凱琪、Jessica C.、張達明、谷德昭等，昨日齊集亞視大埔廠房，為今天播出的《第十五屆十大電視廣告頒獎典禮》拜神，諸葛梓岐為「盜錄」《猛鬼街》事件道歉。
諸葛梓岐說：「我真係好迷玩微博，中咗毒，今次太興奮，過咗火，自覺好錯，當時想影張相同大家分享，冇諗到咁嚴重。（火速認錯，唔想好似唐貝詩咁被網友塞入個奶樽度惡搞？）咁我真係做錯咗，當我上載後都有啲回應話『幾好玩，下次又試吓先』，我都即時刪咗，唔想帶來更大影響。我雖然唔識佢（唐貝詩），但都知有網友惡搞佢，希望大家畀次機會佢。（怕唔怕網友key你個頭上《猛鬼街》男主角Freddy身上惡搞？）如果整得靚都唔介意嘅！」
薛凱琪任亞視嘉賓
另外，她接受有線訪問時亦直言：「我影埋啲櫈側邊，但下次我唔會做埋啲咁低能嘅事。」
戴上黑超出席的薛凱琪則說：「第一次為亞視做大騷嘉賓，會載歌載舞。（驚唔驚永遠返唔到無綫？）大公司之間嘅事，唔係藝人可以參與，我只會做好眼前工作。我除咗現身亞視，仲幫有線去狗場拍專訪。我有留意 『唐貝詩盆景貓事件』，盆景貓太唔人道，我希望藉專訪宣揚愛心、人道對待小動物。（點睇佢用《聖經》金句反擊？）我冇睇，但對每個生命都應該有愛心。」
文：影視組