思浩自詡榴槤美儀嫌臭
近年不少藝人開設甜品屋，五年前已快人一步跟朋友夾份搞糖水舖的梁思浩，早前與拍檔江美儀大談糖水經，更以甜品比喻圈中人。思浩以榴槤慕絲形容自己，美儀在旁笑言：「好臭！」
一句「好臭」，令人聯想到「臭檔」兩字。以榴槤慕絲形容自己的思浩是否經常發人脾氣不得而知，但對江美儀就一定無，因為兩人感情十分之好。早前思浩邀請美儀到其「聰嫂私房甜品」食糖水之餘，還以甜品妙論圈中人。
君如似紅棗蓮子茶
思浩先以榴槤慕絲來形容自己，他表示：「呢樣嘢唔係人人都鍾意，但如果食落去，認識耐咗，就會知道係好嘢嚟。」美儀聞言即笑他：「好臭！」然後她亦以杏仁蛋白來比喻自己：「因為杏仁蛋白上面係杏仁茶，外表唔係好突出，但係食落知道底下係燉蛋白，好有實力。吳君如都得喎！」梁思浩亦以紅棗蓮子茶來形容君如：「佢除咗演戲經驗老到、演技好之外，仲生咗一個女添。」
提到「杰撻撻」的芝麻糊，梁思浩即想起黎耀祥，他表示：「雖然外形唔係好靚仔，但係好有實力，好多人鍾意。至於芝麻糯米糍，就會諗起影帝任達華，因為夠韌力，加上芝麻餡係黑色，令人想起任達華嘅健康膚色。」
文：影視組
場地：聰嫂甜品
攝影：唐豁莊
江美儀髮型：Raymond Chan@LA CHIOMA