阿嬌連環投資買樓又掃倉

穿上背心短褲的鍾欣桐昨午現身英皇地產豪宅「維壹」售樓處，問阿嬌是否來簽約？她表示：「係！今次係嚟睇示範單位，我買咗中高層單位，（係咪二千七百萬？）唔知幾多錢，我對數字冇咩概念。如果先畀一舊錢就有九折，另外老闆仲會私人畀2%折扣，但我都要供，唔會一次過畀。（投資定自住？）會買畀媽咪做母親節禮物，（有傳你復出賺咗一千萬，所以斥資買豪宅？）邊有成千萬，要供樓嘞，所以要慳啲使。」

風水舊屋唔賣

阿嬌除了買海景豪宅外，原來早前亦買了一個二千呎貨倉，專門放她的衣服，她笑言：「個倉仲大過我間屋。（你依家住緊間屋會唔會賣？）我間屋買咗好多年，係風水屋，上手住到發咗達，之後都要買番樓上，我入住之後都好順利，唔會賣。」

昨日不見容祖兒蹤影，霍汶希表示祖兒早上已派人來簽約，阿嬌與祖兒買的單位是同一座，將成為好鄰居，阿嬌表示：「係呀，我岳高頭就可以同祖兒傾偈，電話費都慳番，個單位三十個月後就入伙。」阿嬌除了與祖兒成鄰居外，據知H2O老闆娘余麗絲都買下大單位，而霍汶希就買了細單位。

榮陞豪宅業主的容祖兒，昨日身在南京接受訪問，她表示：「間屋已畀首期，以後要努力工作。（同阿嬌做樓上樓下鄰居喎？）係呀，歡迎阿嬌上嚟借柴米油鹽。」

容祖兒因聲帶不適，要到南京針灸，問她好了沒有？她表示：「針灸後好啲，之前好擔心唔可以再唱落去，依家放下心頭大石。」

阿嬌在保安及工作人員護駕下到「維壹」簽約。

祖兒將與阿嬌成鄰居，傾心事方便不過。（資料圖片）

Juno冇請睇戲

另外，阿嬌與阿Sa、麥浚龍（Juno）前晚於《2010勁歌金曲優秀選第一回》碰頭，問阿嬌有冇見過Juno，她表示：「下午綵排時見到佢，去廁所又撞到，有打招呼，好耐冇見。（Juno有冇請你睇《維多利亞壹號》？）冇呀！套戲嘅導演、監製都係我嘅朋友，就算係都佢哋請先。」

麥浚龍接受訪問時，亦指近期在公開場合比較少與阿嬌見面，見到亦不會尷尬。

文：影視組