林峯做財神街頭派金
林峯昨日以代言人身份為六福珠寶尖沙咀旗艦店主持剪綵，獲贈一條價值五萬元的鑽石十字架項鏈，林峯更即場免費大派「峯」盛虎年足金吊飾，吸引大批市民排隊索取，警方派員到場維持秩序，情況未見混亂。
問林峯代言酬勞是否很可觀？他笑說：「冇八位數。（有冇儲鑽石？）呢啲儲唔起，不過做代言人買嘢有優惠。（買過鑽飾畀女仔？）呢啲唔可以隨便送，只係買過畀媽咪、細妹，暫時仲未有人令我覺得可以送呢啲咁有價值嘅嘢。（搵緊呢個人？）唔使搵，會撞到。（電視城撞唔到？）都咁多年啦，如果要撞到，一早都撞到啦。」
