陳國邦換爐頭冧掂羅敏莊
模範夫妻羅敏莊（Mimi）跟陳國邦（Power）由拍拖到結婚都恩愛如昔，近日二人結伴到香港迪士尼樂園享受「星級款待」，Mimi更興奮地表示他們結婚後老公更疼錫她，Power更改掉以往胡亂發脾氣的性格，令Mimi對他更死心塌地。
Mimi當年跟Power只拍了一個月拖便同居，二人更於去年拉埋天窗，轉眼已有八年時間，但二人每天仍有說不盡的話題，Mimi說：「可能因為我哋工作係同一個範疇，每日都會有好多嘢講，佢就好似我老師咁，我好多嘢都要向佢學習，同埋我有咩嘢秘密都一定會同佢講！」原來他們亦非講究浪漫之人，其中最令Mimi感動的竟是Power買了廚房用具給她：「有次我喺外地做完嘢返嚟，返到屋企竟然發現佢幫我換咗個爐頭，可能對好多女仔嚟講呢樣嘢冇乜特別，但係我就真係好感動！」
糖黐豆返工
Power亦表示會盡量爭取時間陪伴Mimi，Mimi甜笑道：「有時佢會同我講『老婆，我陪你去做嘢啦，要陪你多啲，我點知你幾時死呀』，可能有啲人會覺得佢咒緊我，但係我明白，佢真係想爭取所有嘅時間陪我！」
雖然婚姻生活愉快，不過二人卻沒有生仔的打算，Power說：「其實我哋都算係遲婚，我依家都已經四十幾歲，開始享受緊人生，如果生咗個仔，起碼要等到佢廿幾歲開始穩定我先會安心，到時我都已經六十幾歲啦！」不過二人亦不排除將來改變主意，領養小孩。
文：專案組
攝：吳文聰
場地：香港迪士尼樂園