華哥處男執導向亡父致敬

出爐影帝任達華左擁右抱,獲吳君如及琦琦獻吻贈興。一向表現冷靜的他得獎後破天荒大談家事,直指視哥哥為偶像,稍後更會「處男下海」執導以警察為題材的新片,乘勢向離世的爸爸致敬。

入行卅餘年的華哥終憑《歲月神偷》榮獲「第二十九屆香港電影金像獎最佳男主角」,接獲三百多個祝賀短訊及電話,可謂接到手軟。當旁人為他「零的突破」表現得異常興奮時,他則被指反應過於平靜,華哥為當時的心情解釋:「大會安排我坐喺正中央,反而王老師(王學圻)坐近台邊,好似方便佢上台咁,當時我心諗對方十拿九穩啦,好彩幸運之神真係眷顧我。」

不算遲來的春天

華哥不認同今次是「遲來的春天」﹕「依家先至係個新開始,謝賢同胡楓係我學習對象,總之永不言休,因為我真係鍾意電影。(加片酬?)一定唔會,我有我原則,錢唔代表一切,喺圈裏面贏到嘅友誼先最重要。好似我攞獎,君如仲緊張過我,總之我只會繼續拍好戲。」

鮮有提及家人的華哥,破例大談家事:「今朝打畀媽咪講咗(得獎),佢一手帶大我哋三兄妹,我就遺傳咗佢嘅忍耐力,所以從來唔會喺片場發脾氣。哥哥(前警務處副處長任達榮)依家退咗休,我終於可以講佢,佢係我偶像。(帶個獎座去拜吓爸爸?)唔需要,一切在心中。(最想多謝邊個?)琦琦,喺事業上佢百分之二百支持我,從來唔會打電話嚟騷擾我拍戲,我遲啲會買份禮物答謝佢,但未諗到買乜。」

囡囡嗌哈利路亞

前晚華哥出席《歲月神偷》及《十月圍城》的慶功宴時與君如咀嘴,全場嘩然;反觀「正印」琦琦則比較含蓄,只讓老公錫面頰。由於慶功宴假尖沙咀舊水警總部舉行,華哥坦言﹕「細個成日嚟呢度等爸爸,感覺好特別。(君如輸咗喎。)唔緊要,遲啲同佢、同許鞍華再合作過。」對於永利街居民希望改善居住環境反對保育,華哥等被批評「好心做壞事」,他回應:「佢哋嘅心情我明白,但凡事以大局着想,拆咗永利街改建最多賺一、兩年錢。如果保住條街,將會係一百年,甚至一千年嘅歷史。」

出席完慶功宴後,昨早華哥即乘飛機到北京繼續開工。當他現身機場時,不少旅客即爭取機會與他合照及送祝福。華哥說:「我諗今次可以贏到王老師,全靠香港人為我祈禱咋!」原來之前他送囡囡任晴佳上學,當囡囡得悉爸爸榮升影帝後,即大叫一聲「哈利路亞」,令華哥甜在心裏。生於警察世家的他,揚言明年首執導演筒,計劃揀選以警察為電影題材,向當年殉職的水警父親作致敬。

李治廷多線發展

另外,獲「最佳新演員」的李治廷,很多謝經理人陳善之當初「一意孤行」為他接戲。問到會否棄歌從影或雙線發展?他謂:「點止雙線呀,我咩線都做呀!」

文:影視組