甄妮被圈中人呃三百萬

甄妮將於五月六至八日舉行「甄妮愛SHOW Farewell World Tour」告別演唱會，日前甄妮來港宣傳時，自爆曾遭好朋友出賣，令她不敢再和圈中人深交。事發在四、五年前，她和相識達二十年的女性友人夾份投資買樓，當時她支付了三百萬，但其後發覺對方開設的公司沒有她的名字，自知事有蹊蹺，追查下才發現友人有心騙財，她說：「原來層樓賺咗好多錢，佢都瞞住我，仲叫我再掟錢投資，我梗係唔肯啦，我要佢分番錢畀我，佢都避我，最終搞咗好耐，我先追番個本金，早知我擺喺銀行收息好過。」

良心當狗肺

問她友人是否缺錢才騙她？她說：「佢好有錢，仲係名人，我唔方便爆佢個名出嚟，否則好大件事，不過我覺得佢好無恥，朋友都呃。」甄妮強調曾為此事嬲到失眠，但絕非因為錢的問題，而是不甘被朋友「良心當狗肺」，她又戥朋友慘：「我覺得佢係受身邊嘅女性朋友唆擺，如果佢再係咁，一定被人呃到連飯都冇得食，我係心痛佢將來冇好日子過。」

與友人終老

雖然被朋友出賣，但甄妮仍覺得眾多朋友中還有可靠的人，她謂：「所以我覺得細個時識啲朋友係最真、最純，唔會呃我。」她心目中最理想的退休生活是，和幾個女性朋友一起生活終老。」問她為何不找男伴？甄妮就覺得：「女人都咁上下年紀，唔一定要男人。」

採訪：音樂組

髮型：KANZAKI for HAIR DENNIS KWOK

場地：CONRAD HONG KONG