美味天使虎年發威多得錢國偉
以「柑桔」陳蕊蕊為首的樂隊組合「美味天使」(Angel)，誓要虎年發威，因為「柑桔」生肖屬虎，所以特別口響。而她們正在籌備出碟，更不忘多謝監製錢國偉，幫她們穿針引線。
樂隊Angel雖未成形，但隊長「柑桔」陳蕊蕊連日來都與隊員「香蕉」王淑玲、「藍莓」劉俐和「蜜瓜」關婉珊齊齊練歌和排舞，她們積極裝備，無非是想當《Angel》一出，予人一種專業感覺，絕非玩玩吓，柑桔說：「唔好以為我哋仲係跳緊《美女廚房》間場嗰啲歌舞，好認真o架，我哋依家隔一、兩日就練歌、排舞，都幾辛苦o架！」
新歌有快有慢
目前《Angel》正在揀歌階段，「柑桔」稱希望第一張碟可以有兩至三首歌，有快有慢，配合巿場需要，（邊間公司做老闆？）傾緊，未可以公布住，幫我哋做音樂嘅都係行內嘅音樂人，講真，我哋係『美味天使』出身，演出期間的確識唔少人，都要多得監製Wilson（錢國偉），今次我哋出碟，佢好支持，出唔少力幫我哋穿針引線。」
否認出席飯局
近期錢國偉捲入涉貪風波，不少人都跟他劃清界線，但蕊蕊很關心對方。問有否致電錢？她說：「冇，不過有ＳＭＳ佢，佢都有覆我話ＯＫ，見佢話冇事我都安樂啲。（有指藍莓『落閘』話同錢國偉唔熟？）我估佢唔係咁嘅意思，佢有時要拍劇，少啲同我哋一齊食飯。」因有指錢國偉帶同一眾天使出席有酬勞的飯局，蕊蕊否認有其事，並說：「有人搵我做嘢嘅話，Wilson都會叫對方直接搵我，經佢嘅都係ＴＶＢ工作。（出飯局有錢收？）冇，我地食飯都係同啲識嘅人，冇收過呢啲酬勞。」
文：影視組 攝：司徒國榮 場地：嘉里白鷺湖互動中心