鄭嘉穎分身有術狂掘金

無綫新劇《鐵馬尋橋》上周收視只屬一般，但口碑不俗，男主角鄭嘉穎更分飾父親及兒子兩個角色，他直言極富挑戰性，並寄望收視會愈來愈好，他說：「《鐵》係我最鍾意劇本之一，加上一班演員拍得好開心，同馬國明、唐詩詠、嘉華哥好似一家人一樣，拍完大家都會約埋出嚟食飯、睇戲，如果收視好就有機會拍續集，到時大家又可以再合作。」

樓市高要睇定

劇集收視仍在衝刺階段，但嘉穎透露今年收入十分可觀，年頭至今已有七位數字進帳，難怪他笑不攏嘴：「新年時去咗美加拍廣告，同接咗幾個登台騷，五月又會同陳豪、吳卓羲、黃宗澤去馬來西亞開演唱會，覺得今年好充實，希望可以快啲達成媽咪願望，買番層樓，但依家樓市太高，都要睇定啲。」

問到媽媽有否催他娶老婆？他笑說：「兩年前就有，話有仔趁嫩生，但大家唔好勸我，未到結婚都唔會講感情事。」

嘉穎搵錢不忘行善，早前便與周慧敏到越南探訪。

嘉穎希望劇集收視好，可以和楊怡等原班人馬拍續集。

關注貧困問題

嘉穎搵錢之餘都不忘做善事，他透露早前與周慧敏一同往越南探訪當地貧困家庭，他說：「預咗當地衞生環境會好差，但覺得好有意義，好想令更多人關注貧困問題。」他表示自己有贊助十位小朋友讀書，他說：「四、五年前已開始助養兒童，最近多咗兩個喺越南，有時收到佢哋送嘅心意卡已經好開心。」

文：專案組

攝：沈健程

服裝及場地：Stage of Playlord