嘉樂自己打自己 金剛爆粗贈興
獎門人曾志偉率領錢嘉樂及新主持江欣燕、金剛、Otto為遊戲節目舉行拜神儀式，說到節目特別版將會與香港電影金像獎「對撼」時，有份角逐獎項的嘉樂笑言「自己打自己」是創舉，志偉則謂隨觀眾喜歡選擇，看一邊錄一邊。
曾志偉、錢嘉樂、江欣燕、金剛和Otto出席《超級遊戲獎門人大爆發》拜神儀式，遲到半小時的江欣燕要獎門人苦候，不施脂粉趕來的她即時說不好意思，志偉寸她識搶鏡，更謂：「尋晚開會話自己會成焦點，原來就係咁。」提到無綫播此節目特別版將會與亞視播映的金像獎打對台時，志偉說：「都係安排咗嗰日，咁蹺啫！」在旁的嘉樂即謂：「自己食自己就慣，自己打自己都係第一次，同一時間喺兩個台出現都係一個創舉。」問志偉望觀眾看哪個台時，醒目的他即謂：「睇一邊錄一邊囉！兩樣都咁新鮮，（睇邊度同錄邊度？）睇大家鍾意啦！原則上睇獎門人，如果啲人睇金像獎，就係金剛佗衰家。」金剛不明白「佗衰家」意思，志偉用國語解釋是「害全家」時，金剛竟爆出：「冚×剷！」場面搞笑。
實請湯盈盈
談到首集嘉賓會請嘉樂的緋聞女友湯盈盈，嘉樂即謂：「呢個一定啦！（仲有呢？李珊珊呀？）李麗珍嗰啲呀！」志偉聞言笑謂：「嘩！唔講唔知喎！啲嘉賓係環保嘉賓，循環再用。」另外，王喜年頭於blog內已指無綫風水不好，志偉說：「黐線！佢係第二個李居明呀！呢啲邊有架！」他又直言與錢國偉有聯絡。
此外，有份憑《新宿事件》角逐金像獎「最佳動作設計」獎項的錢嘉樂被問及信心時，他坦言：「難啲，另外四套都係古裝、功夫片，比較着數啲，不過都希望觀眾投一票，其實都開心，因為憑《錦衣衛》獲提名嘅谷軒昭係同期入行兄弟。」
文：影視組