祖兒氧氣箱隨身保住靚聲

容祖兒、林峯、何韻詩、徐子珊等前晚出席《IFPI香港唱片銷量大獎2009》，以4個半獎成為大贏家的祖兒聲沙沙說：「可能香港空氣差，之前去澳洲都冇事，真係要隨身帶備氧氣箱先可以出街！」

食類固醇變pizza面

祖兒透露好友陳奕迅（Eason）向她介紹「人神術」，但原來祖兒早有良策，她說：「睇醫生又要食類固醇，食完成塊pizza面，依家計劃月底返內地針灸，掂過人神術。」祖兒表示會介紹醫師予Eason，問到何不邀請名醫來港？她說：「之前有試過，但醫師年紀都唔細，都唔想佢周圍走，上次佢囡囡陪佢嚟，仲因為食錯嘢要入醫院，好唔好意思。」

祖兒又透露早前與草蜢到馬爾代夫拍攝節目，寓工作於娛樂，她說：「都晒黑咗，但有同事因為嫌唔夠黑搽咗好低度數嘅太陽油，最後晒到成個菲律賓人咁。」

林峯就以三獎成為男歌手之冠，榮獲「最高銷量男歌手」的他，對於四大唱片公司未有參與，勁敵大減，問到林峯會否擔心得獎欠說服力？他說：「點都會有言論，做好自己本分啦，都想多啲人參與，（認受性增加？）樂壇係大家庭，歌手之間感情都好好，少咗一個見面機會覺得有啲可惜。」

王菀之（左）以中性打扮亮相，而平時愛反串的何韻詩卻穿上裙子。

G.E.M.已成音樂頒獎禮的常客。

徐子珊可以再性感

此外，徐子珊勇奪「最暢銷本地女新人」獎，她笑言銷量好全憑各地歌迷守望相助，她說：「隻碟只係喺香港發行，海外歌迷要託香港朋友買，當中有啲寄失同寄爛，又要再買，都好慘，可能咁樣增加銷量，其實自己唔知銷量，總之老闆話仲有得出就OK啦。」正計劃再度出碟的徐子珊表示路線由公司與歌迷決定，不介意繼續性感。

採訪：音樂組