李彩華掃貨男友波子接送
近年喺內地密密拍劇搵人仔嘅李彩華（Rain），自從被爆跟保險界才俊王傲山拍拖後，經常畀人影到拖手食消夜，但佢仍然否認戀情。日前八太喺中環見到趁住放假返港嘅Rain，爭取時間四出購物，之後男友仲好體貼咁揸車前來接送，實在羨煞旁人！
現年26歲嘅Rain，同任職仁愛堂總理兼保險界才俊王傲山（Marcus）相戀年多，即使畀人影到拖晒手仔食消夜，甚至車廂內咀嘴，Rain都否認拍拖，只稱對方係好朋友。去年底，傳出Marcus買千萬豪宅送贈，事後Rain否認報道，表示對方只係平租畀佢住，仲話男女要財政獨立，可見兩人感情穩定。
悉心打扮
早前八太去咗中環行街，期間見到悉心打扮嘅Rain，又係啱啱喺附近「濕平」完，拎住戰利品一個人係咁向前行，原來Marcus早就將架白色波子跑車停咗喺路邊等緊佢，Rain見到男友架車，就好順手咁打開車門，企喺出面同男友傾咗幾句先上車走人。
開懷大嚼
另一日，Rain就撇下男友，約咗個女性朋友喺銅鑼灣百德新街一間餐廳醫肚，見佢哋張枱擺滿晒食物，友人係咁望住Rain傾偈，而「為食妹」Rain就好唔客氣咁起勢咁食，好在佢都算食得有儀態，如果唔係就失禮死人喇！期間Rain見到記者影相，仲好大方咁對住鏡頭微笑。之後Rain同朋友一齊分享手機相片，仲不時舉杯暢飲檸茶，冇錯！係檸茶。最後兩人逗留個多小時，當然由近期賺唔少嘅Rain埋單啦！