傅穎遭玩弄另有其人
傅穎（Theresa）昨日獲邀出席「奧海城海洋微妙世界」展覽，曾自爆遇到圈中愛情騙子、令鄭中基（Ronald）成頭號嫌疑的她，力撐對方沒有玩弄感情：「我從來冇講過佢係騙子，係另有其人！」對於「Sa基」宣布離婚，Theresa坦言不想講太多，不予置評。
昨日Theresa以海洋保育大使身份出席「奧海城海洋微妙世界」展覽，信和集團商場推廣總經理蘇蔡潔蓮向她送上鯨魚公仔，Theresa即賣口乖指最喜歡鯨魚，更與鯨魚公仔嘴對嘴。
出書談愛情
Theresa呼籲大家要注重海洋保育，雖然喜歡食海鮮，但不會食魚翅及數量少的海產。她又透露剛完成新書，會繼續剖白自己的愛情，亦會寫別人的愛情故事。她說：「我唔會開名，亦都冇舊公司同事，本書會四、五月出，書展就會出寫真。」
日前蔡卓妍（阿Sa）與Ronald宣布離婚，有傳因阿Sa難忍鄭中基花弗。曾與Ronald傳緋聞的傅穎對此表示：「我冇留意，我同佢只係N年前拍過戲。（當時有冇追你？）我同佢只係拍戲嘅拍檔，冇其他嘢。」
往事不堪提
曾在書中自爆遇圈中愛情騙子的Theresa，被問是否暗示Ronald時，她即澄清：「我冇講過佢係騙子，舊公司嘅同事都唔係騙子！（係咪另有其人？）係，不過我唔想公開，都過咗成年，唔想呢個人喺我生命中存在！」
對於「Sa基」離婚，Theresa坦言若換轉主角是自己，亦不想其他人說得太多，更指很多事只有「Sa基」才知道，不方便評論。
文：音樂組