Baby拖黃曉明北京夜蒲
被傳是鄭中基新歡的Angelababy，昨日立場堅定地以「打死都唔會」否認是第三者，原來伊人企硬皆因心有所屬！上周日Baby被目擊在北京以正印女友身份會合黃曉明，並拖男友和其友人打牌兼去夜總會開P。
盛傳跟黃曉明打得火熱的Baby，一直否認兩人的情侶關係，但紙卻包不住火，本報收到消息，指Baby於廿一日（上周日）現身北京，並跟黃曉明和一班來自內地及台灣的朋友打牌，由於當中有位南京朋友生日，故一行人決定在北京朝陽區朝外大街乙十二號，位於昆泰嘉華酒店的紫水晶夜總會搞派對。
戴黑罩掩人耳目
為防行蹤外洩，夜總會即時通知服務員及工作人員不可拍攝，就連出入黃曉明所屬房間的服務員，也不能攜帶手機，以免場內情形被攝。
去年與王秀琳約會的黃曉明，看來有鋪「戴罩癮」，當晚他進入店內位於M層的168號房間，為掩人耳目又戴上黑色口罩，跟Baby保持距離外，就連在房內也全程戴罩，十分謹慎，Baby則靜靜在旁坐着，未有親熱舉動，但目擊者稱見到兩人曾在走廊暗角短暫拖過手，Baby真人亦比上鏡更好看。兩人在該址逗留約半小時後，雙雙先行離去。
Baby昨日現身《bread n butter2010春夏系列預展》時，表示早前往上海行騷，被問到期間有否做私人事？她即笑說：「行完騷都返香港。（有人見到你去北京？）我冇去過北京，（有人見到你同黃曉明拖手去夜總會？）嘩！咁開心？可能有人認錯。」
至於曾否和黃曉明拖手，她說：「其實已經傳咗好多次，又話唱K同探班，我好耐冇見過佢，（拖手？）冇，一陣間我都要同佢講聲，費事以為我炒作新聞，（每次都通知對方？）睇吓有幾嚴重。（話黃曉明當日戴口罩？）好多明星都有呢個習慣，我冇留意佢係咪。」笑問會否發誓冇跟黃曉明拍拖去夜總會時，Baby只說：「我唔會隨便發誓。」
寧死拒當第三者
Baby又主動向傳媒澄清非Sa基婚變的第三者，並三次連聲說：「一定係假！還我清白！打死都唔會（做第三者）！」她續說為兩人的分手可惜及感慨，又指胡亂報道只會令當事人不快。問她跟陳偉霆是否因報道而影響發展？Baby說：「喺呢行兩個人一齊要好大勇氣同信任，順其自然囉。」她笑言將來不敢在美國結婚，或會在家中註冊較安全。 文：名人組