阿Sa激動：遲早傳有私生子

昨日下午四時，阿Sa由助手陪同下從跑馬地寓所坐保母車到炮台山排舞室，會合Twins拍檔鍾欣桐（阿嬌）為演唱會綵排。平時笑容滿面、健談開朗的阿Sa昨日收起笑容，全程鬱鬱寡歡，自她與Ronald舉行記者會宣布離婚後，傳聞多多，她大受打擊備受困擾，據知她不但失眠，更食不下嚥，原本已經纖瘦的她更骨瘦如柴，我見猶憐。昨日在排舞室的她對所有事物都提不起勁，僅與阿嬌埋位綵排時才勉強擠出一絲笑容，阿Sa接受訪問時更一度顯得忟憎，講到激動時更雙眼通紅。

Sa：蔡卓妍　記：記者

記：你個樣好憔悴，係咪好困擾？

Sa：（苦笑，點頭）係。希望公司體諒畀我喺演唱會之後，將啲工作延遲，等我可以抖吓！我依家真係乜都諗唔到。

記：有傳你在上海結識富豪第二代，成為與Ronald離婚導火線？

阿Sa強打精神為演唱會排舞，可是仍見她無厘神氣。

Sa、嬌為即將舉行的演唱會加緊排舞。

講第三者咬牙切齒

Sa：（碌大雙眼，咬牙切齒地說）嗰日我同Ronald喺記者會上都好清楚咁交代，我哋之間冇第三者。冇上海富家子弟，根本就冇呢個人存在，我可以用時間嚟證明。（皺眉，愈講愈激動）我都唔知講乜好，要求證嘅話，可以打畀Ronald。（雙眼通紅）每日都有充滿敵意嘅新聞，一時又話有富家子，一時又話有第三者，遲早傳我哋有私生子！

記：你有冇打過電話同Ronald講？

Sa：有，我哋有聯絡，今日打電話畀佢，同佢講呢件事（指富家子傳聞），Ronald都話有記者喺北京問佢。

記：你哋日日都有聯絡？

Sa：（點頭）有。

記：你哋咁緊密聯絡，有冇可能復合？

Sa：（低頭不語，沉默一會，搖頭）雖然我哋分開咗，仍然係一對好朋友，任何傷害到對方嘅事件，我哋都會為對方唔開心。希望大家畀啲時間我去淡忘呢件事。

記：淡忘？係咪受到傷害？

Sa：（斬釘截鐵）冇。

記：咁點解離婚？

Sa：（唔出聲，搖頭）

記：當時去美國結婚，係咪精心部署？

Sa：（苦笑）唔係。

記：有冇結婚戒指？

Sa：（阿Sa望望左手無名指，沉思一會，搖頭）冇。

記：結婚呢四年，你哋有冇計畫生BB？

Sa：冇。

記：有冇一首歌可以形容你同Ronald感情？

Sa：（顯得忟憎）我真係咩都諗唔到，冇呀！

記：咁依家嘅心情係點？

Sa：（嘆了一口氣）都係要做嘢架啦！集中精神做完個演唱會先，依家真係咩都唔想諗，希望時間快啲過去。

問英皇藝人管理及唱片部總監霍汶希（Mani），阿Sa合約有否列明不准結婚？Mani說：「合約冇話唔准結婚呀！公司與藝人之間係工作關係，私人事從不過問，對佢哋非常尊重與信任，連日來各種敵意新聞對阿Sa和Ronald已造成好大傷害。（公司有否怪責阿Sa瞞婚？）冇。其實公司與歌迷都公認佢哋係一對，結婚亦唔驚訝。其實最辛苦係守秘密嘅人，更何況要守四年咁長。」對於阿Sa要求放假，Mani表示會盡量配合，演唱會後有三個廣告和國語碟錄音工作會順延，而阿Sa與古天樂的新戲則會如期開拍。

文：專案組