吳彥祖不設防隨時做老襯
由吳彥祖（Daniel）與內地女星袁泉主演、羅卓瑤執導的新片《如夢》，被選為第34屆香港國際電影節開幕電影之一，前晚於會展舉行盛大首映禮。Daniel廣邀圈中好友楊千嬅、馮德倫、廿四味撐場，但女友Lisa S.則因替《第四屆亞洲電影大獎》任司儀，忙於綵排而未能現身，但Daniel姊姊及專誠由美國來港的吳媽媽前來支持，已令他萬分雀躍。
Daniel說：「媽咪好錫我，佢睇我嘅戲實讚，女友就有讚有彈，近排我哋已經開始不設防，有咗就結婚生仔，到時我會停工一年照顧女友。（怕唔怕女友高齡產子？）唔怕，我二家姐四十三歲生ＢＢ都係咁啦！（袁泉冇嚟係咪準備生ＢＢ？）我知道佢差唔多係呢幾日生，我唔敢打畀佢，怕刺激到佢作動生Ｂ呀。」
千嬅生仔負荷大
當千嬅得悉Daniel的造人大計即說：「我同老公丁子高唔係唔生，係一路有嘢做，我呢個年紀行步路都要小心，男人就瀟灑，女人體力負荷好大。（係咪男人打個冷震搞掂？）你咁都講得出口！我唔知，總之今年好多嘢做，係生ＢＢ都出年先，公司合約冇講明唔畀我生。」
同場的馮德倫對於獲緋聞女友徐若瑄大讚是好男人，他說：「多謝！（佢生日你有乜表示？）送咗個生日短訊畀佢。（佢話你追佢會考慮。）係咪呀？唔好點我！（佢知唔知你心意？）我唔知佢明唔明我個短訊喎！」
文：影視組