陳霽平同男友拍拖零交流

港姐出身嘅陳霽平，雖然咁多年嚟喺圈中發展麻麻，主要都係做吓主持同接吓啲商場司儀騷，間唔中都會客串吓電影嘅，不過唔緊要，皆因Maria年幾前已釣到金龜，同六十年代船王趙從衍嘅孫，即係趙世曾個姪仔趙式言拍拖。四十歲嘅趙式言斯斯文文，仲係鬼咁有愛心嘅兒科醫生，上年Maria同佢拍咗拖幾個月，男友已經拖佢出席趙式和嘅婚禮，兩個仲鬼咁煙韌大晒恩愛。

前後腳搵食

雖然Maria已經公開咗戀情，但早排八太見佢同男友喺中環拍拖時依然好避忌。當晚大約十點幾，着住件大褸嘅Maria雙手插袋，同戴住冷帽嘅男友喺蘇豪區行嚟行去，兩個似乎搵緊地方撐枱腳。佢兩個初時隔咗幾個身位嚟行，仲要零交流，唔知佢哋拍緊拖嘅，仲以為兩個互不相識添。直至佢哋路經一間食店，兩個先至「復合」，仲商量入唔入去間食肆醫肚好，但期間見Maria手指指，似乎另有提議，之後兩個就行咗去另一間餐廳，但臨入門口時，Maria又鬼咁警醒，四周圍望完一輪後，仲等男友入咗去，自己先行入餐廳。

Maria揀餐廳食飯時同男朋友有商有量，覺得唔啱心水就提議去另外一間。

放大圖片

耷低頭走人

Maria入到餐廳後就同男友揀咗張近玻璃窗嘅枱坐低，兩個仲即刻叫到成枱都係嘢食。當食物上枱時，Maria同男友仲連嘢都唔講多句，先大擦一餐，食足成半個鐘兩個先吔飽。不過當Maria見唔少途人眼望望時，就拿拿聲耷低頭，之後仲急急腳埋單走人，佢出門口時當然又係同男友前後腳啦，其實都已經公開咗戀情啦，Maria使唔使咁避忌呀。