熊黛林唔敢講城城好男人

郭富城與Lynn傳緋聞，經已傳了多年，但兩人每次面對傳媒追問，都大耍太極，迴避問題，不過，甄子丹就「冇有怕」，昨日他與Lynn、黃百鳴及兒子黃子桓、新人鄭家星宣傳電影《葉問2》，甄子丹在台上大讚自己是「男人人辦」，好似一個好好打的宅男，「男人想似，女人鍾意」，又讚自己「有經濟、風度及賣相。」自讚完一輪，就指一指隔籬的Lynn，笑言：「你好似搵到。」明顯擺Lynn與城城的緋聞上枱，令Lynn頓時嚇窒，滿臉尷尬，隨即指一指甄子丹是好男人，為自己解圍，繼而指自己「搵緊」。

要畀時間睇

穿上低胸裙的Lynn，在台下接受訪問，記者即追問她是否還未搵到好男人？她即扯開話題，指不是說緊一些結了婚的好男人；問她心目中好男人應該怎樣？她表示：「要為家庭拚搏、錫太太仔女，（身邊有冇男人有潛質？）要多啲時間去睇睇，（郭富城呢？）佢係一個幾好嘅男人，（冇缺點？）冇乜特別觀察。」Lynn一聽見傳媒問「城城」問題，即面紅耳赤，有點尷尬，記者再追問是否因城城優點太多，而看不到對方之缺點？她說：「可能，唔知呢，（冇缺點，即係搵到啦？）真係要畀啲時間我睇下，（睇咗三年幾都未夠？）我都要做嘢o架！」

做住朋友先

有記者指Lynn若結婚後就可以不再工作，Lynn對此表示：「唔會唔工作，女人唔做嘢就唔靚好易殘，要keep，（唔想有承諾？）唔會要求任何嘢，（想幾時公開？）冇諗，任何嘢都順自然，（幾時認定另一半？）未搵到，朋友同另一半唔同，要啲時間去睇下，不過佢（指郭富城）都係好好嘅男人，好多女仔覺得佢好好，我都覺得佢好好，不過冇諗咁遠嘅事，都係做朋友先，（係咪因為好多女仔對佢好，所以你有擔心同隱憂呀？）唔知呢。」被逼供一輪的熊黛林，熱到面紅紅，完成訪問後都不禁說了句：「好熱，降溫先。」

文：影視組