楊思琦楊怡大方認助查

無綫高層陳志雲與監製錢國偉等涉嫌貪污被捕，有指懷疑有高層包庇親信開設的公司，在大型綜藝節目中「抽水」，並涉運用影響力壓價邀請藝員出席「自己友」籌辦的商場及剪綵活動，從中獲得利益。

就此廉署已向無綫多位職藝人取證，無綫因而向藝員下封嘴令，為免惹禍，各藝人對事件表現避忌，其中鍾嘉欣、楊思琦昨日返回電視城時，一見門外記者即表現緊張、雞飛狗走，鍾嘉欣更耍手擰頭叫「唔好」，騰雞得很，反觀楊怡就吹晒口哨，狀甚輕鬆，之後楊怡、楊思琦出席劇集宣傳時，更大方承認曾協助廉署調查。

楊怡：我係TVB派（設計對白）

楊怡（左）、楊思琦在記者會上則大方任影。

收工吹埋口哨

楊怡與林峯昨晨於電視城為無綫新劇《不速之約》開工，二人表現輕鬆，還遠遠地向記者揮手，態度自如，楊怡在完成拍攝後，更輕鬆地吹口哨！之後，她在奧海城出席新劇《鐵馬尋橋》宣傳時，承認接受廉署協查，但內容就不便透露，問到她有否與陳志雲助手叢培崑的公司合作？她說：「唔知，通常啲工作由經理人負責。（有冇畀人壓過價？）通常價錢由公司經理人傾，自己乜都唔理。（你係志雲派，工作有冇受影響？）我係TVB派，fans就有分黨派，嗰啲（即指着現場自己的fans）係楊怡fans。（有冇致電陳志雲？）冇，向來冇陳志雲電話，但希望佢會冇事，希望事件快啲平息。（有冇試過『拍膊頭』免費出席活動？）工作通常由經理人傾，價錢都好合理，有冇『拍膊頭』真係唔清楚。」

鍾嘉欣耍手擰頭，愈叫愈走。	林峯匆匆入廠化妝。	楊怡、林峯（左二）在電視城輕鬆拍劇。

唔方便講壓價

在電視城看見記者就兜頭走的楊思琦，在宣傳活動上承認有份給予資料廉署，她說：「有份協助調查，都係問工作上嘅嘢，知道好多同事都有份助查，現階段唔方便講太多。（係咪日前專誠返電視城協助廉署？）公司打電話叫我返去。（有冇同叢培崑間公司合作過？）唔知，通常由經理人安排。（有冇試過壓價？）唔方便講，但經理人會為我爭取最好條件。（會唔會『拍膊頭』出席活動？）唔會。」

而剛為《志雲飯局》擔任嘉賓錄影的惠英紅，可會擔心《志雲飯局》會被刪除？她表示冇所謂：「呢啲都係公司策略。（有冇試過壓價？）都係常價。」另外，監製何小慧昨返電視城，問她有否參與廉署協助調查？她即風趣的說：「你哋睇報紙咪知咯。」

陳自瑤未聽過有壓價事。	湯盈盈企定定任影。	放大圖片

文：影視組