謝安琪失聲亞視錄影NO SHOW
周杰倫師妹袁詠琳昨日為亞視歌唱節目《亞洲星光大道2》進行錄影，同場還有肥媽及曾寶儀等。有指環球旗下歌手謝安琪（Kay）昨日本會現身該節目及即場獻唱，但之後卻傳出她因為怕亮相亞視而令四大唱片公司跟無綫的關係惡化，故她臨時缺席。
唔認臨時縮沙
對此亞洲電視綜藝及資訊科總監賴華民解釋：「之前佢係答應咗嚟，但錄影前一晚佢公司同事話Kay失聲，所以先會缺席。（覺得佢係縮沙？）唔會，因為我哋安排咗佢以特別嘉賓身份出席兼唱歌嘅。」賴華民指待Kay康復後，會再安排她亮相《亞》的錄影：「依家仲未定係第幾集，因為要度期。（會請其他歌手？）會有一個內地一個台灣，但仲未落實，另外我哋星期二亦會喺節目《亞洲紅人館》中訪問陳慧琳。」而謝安琪則透過經理人表示：「Kay呢幾日都唔舒服，尋日仲失埋聲，所以咁樣上唱歌節目唔係咁好，等佢好番先再上啦。（話Kay係縮沙？）唔好諗得咁政治化。」
肥媽有意從政
SONY旗下台灣歌手袁詠琳昨日由七位工作人員陪同現身亞視，自言未曾到訪過TVB的袁詠琳，坦言有機會亦想到TVB見識一下︰「當然希望可以去。」另外，有傳肥媽有意涉足政壇，對此她直認不諱，並謂若得不到家人支持就會打消此念頭。而說到謝安琪缺席昨日錄影，肥媽力撐對方：「個節目係唱live，所以佢失聲缺席係尊重個節目。」
文：影視組