周倩圯獲禮待Amanda冇人吼
【劉慰思巴黎直擊】周倩圯與Amanda S.於巴黎時間前日欣賞Lanvin時裝騷，周倩圯在品牌老闆的引領下，與設計師會面，對方還大讚她靚女，相反Amanda卻被冷落，待遇大為不同。
模特兒周倩圯（Samantha）與Amanda S.於巴黎時間前日出席Lanvin 2010秋冬時裝騷。向來與Lanvin關係要好的Samantha，與擔任形象指導的緋聞男友Ricky（郭慶彬）同行。Samantha穿品牌服裝上陣，與老闆王效蘭見面，兩人一見面即雞啄唔斷。完騷後，更被對方邀請入後台，介紹設計師Alber Elbaz給她認識，Alber還大讚Samantha靚女。至於在巴黎學廚的Amanda也有到場，但風頭遠不及Samantha，備受冷落。
興奮到胃痛
Samantha坦言從未去過巴黎欣賞殿堂級時裝騷，直指自己興奮到失眠及胃痛，她賣口乖說：「我好鍾意Lanvin，每季都會入貨。」今次她會與Ricky在當地逗留十一日，但強調二人純粹好友，她說︰「我哋係工作夥伴，佢好有時尚觸覺，會幫到我時裝方面嘅資訊。」而Ricky亦無懼緋聞，並澄清︰「今次因為工作先同佢一齊嚟，我收友情價，之前都傳過我同鄭欣宜、張可頤啦！」
望男友求婚
至於同場的Amanda清減不少，她解釋因近排忙於返學，男友曾兩度飛到當地探她，她說︰「一次係我生日，一次係情人節。（佢有冇同你求婚？）冇，我都想，佢求婚我會答應，就算隻戒指係塑膠都OK。」她稱三月份便畢業，但六月會再到巴黎的餅店做臨時工。