愛靚唔愛命的佘詩曼，完全無視氣溫急降嚴寒，昨日出席馬場活動時，竟以露肩吊帶單薄短裙「玩命」上陣，凍得要咪嘴獻唱兼表情僵硬外，態度更強硬，對於近日跟陳豪的緋聞，阿佘「企硬」交由律師處理外，力言和陳豪及廖碧兒全無過節！
昨日大年初三，沙田農曆新年賽馬日正式開鑼，身為表演嘉賓獻唱賀年歌曲的佘詩曼和官恩娜（Ella），雖見人人大褸一度，但在出場前卻脫下大褸，只以薄衣示人。以Lanvin的露肩吊帶連身裙捱冷獻唱及向觀眾派利是的阿佘，事後承認因太冷而改為「咪嘴」不唱live；而只以短袖連身裙「禦寒」的Ella，全程不停周身郁來取暖，之後跟名廚周中烹調賀年菜時，更頻頻說要對方為自己擋風！
不甘被踩底線
自言跟母親和幕後工作人員過年的阿佘，當被問到有否到緋聞男友陳豪家拜年，阿佘即表現愕然說：「呢方面唔想再講，（有報道寫你哋幽會？）交由律師處理，唔會講太多，唔希望再提呢啲新聞，因為唔係事實，（最影響到你咩？）係踩到我條底線，唔開心嘅嘢唔想再講。」
至於有否跟陳豪談論這緋聞，阿佘只說：「我話畀佢聽我點做，佢點做我唔知，（支持你？）佢冇表態。（見到佢同廖碧兒尷尬？）唔會，三個都係受害者，同埋我哋係冇過節，唔好以為係真。」
官恩娜想中3T
另外，在美國拍新片《東風破》剛回港的Ella，表示跟男友的首個情人節要異地相隔，更言因太忙已有兩星期冇見過對方。她續說會投注3T望得五千萬彩金，問到是否中獎即嫁，她說：「唔諗呢啲，反而想買樓收租做包租婆，不過我係冇橫財運。」
有此一著
佘詩曼以法國品牌Lanvin的露肩吊帶裙上陣，大方得體，紅色真絲的物料十分應節，簡單配襯四吋高的高踭鞋，有助拉長雙腿的線條，養眼非常。
文：名人組