尹志強離世，一班昔日並肩馳騁球場的隊友，不禁深表惋惜，更大讚尹佬是義氣仔女。
鍾楚維：肯聽又肯做
司職中鋒的尹志強，在出道初期就被稱為「鍾楚維二世」，對於當時這位接班人，鍾楚維至今依然有讚無彈：「當年出外比賽我哋都係同房，等我哋可以交流多啲，佢都好虛心學習，肯聽又肯做。我都好高興有佢做我嘅接班人。」退役後，鍾楚維與尹佬在商場繼續並肩作戰，一起營商十多廿年。
劉榮業：佢好夠義氣
與尹佬在香港隊南征北討多年的「蠱惑仔」劉榮業，當得悉多年戰友與世長辭後，不勝唏噓道：「好可惜，一代中鋒咁就過咗身。」他續說：「佢好夠義氣，朋友出到聲，佢幫到實幫。好似我之前中山嘅廠開張，我打畀佢話想佢嚟支持吓，佢就二話不說同成班明星朋友嚟剪綵同撐場，認真唔話得！」
梁能仁：打吓麻雀仔
當年與尹佬衝鋒陷陣，有「陰毒仁」之稱的梁能仁說：「尹佬因為頭槌好，我踢中場畀波都會容易啲，睇住佢嚟交就掂晒喇！作為隊友，佢真係無可挑剔。」梁能仁表示，尹佬偶然也會參與「打吓麻雀仔」，亦因此與「雀壇高手」、綽號「大哥瑜」的蔡育瑜十分老友。
