韓國人氣男子組合SHINee前晚在港與近五百市民倒數迎虎年，現場過半數圍觀者皆是他們的粉絲，吶喊聲令同場的林峯亦感震耳欲聾，HotCha三位成員則坦言被SHINee迷倒，SHINee虎年先攞頭彩。
韓國人氣組合SHINee、亞太區最受歡迎男歌手林峯及本地女子組合HotCha，前晚現身屯門市廣場《招財貓倒數迎新歲》。SHINee入鄉隨俗，與fans大玩《獎門人》爆波遊戲，又唱又跳多首勁歌，令女fans𠵱嘩鬼叫。
機場被圍嚇一驚
完騷後五子好整以暇才接受訪問，翻譯指有關拍拖問題概不作答，SHINee說：「首次喺中國人地方過新年好高興，雖然唔知利是係乜，但估同『恭喜發財』有關。（畀fans熱情嚇親？）喺機場被fans包圍確有少少嚇親，但都開心，近距離接觸後，覺得香港同韓國fans冇分別，都好鍾意我哋。」
問到會去香港哪裏玩？SHINee說：「我哋初來香港，去咗山頂，唔熟其他景點，但知香港出名shopping。（情人節點慶祝？）同朋友、同SHINee成員一齊過。」
林峯與SHINee同台後表示：「台上台下好多90後，現場吶喊聲好似開concert咁。」林峯與性感貓女玩遊戲時，被貓女用大腿挑逗，即時耳紅顯得一臉尷尬，他說：「我塊面唔易紅，耳仔好易紅，之前同高海寧拍戲，佢挨個頭埋嚟，我耳仔紅到唔連戲，要即敷凍水。（新年點過？）年初一至年初三放假，留港陪屋企人，主要節目係瞓覺。」
送白兔糖交換MSN
HotCha三女直認被SHINee電暈：「佢哋唱live好有力量，走位好協調，我哋有偷師，仲送咗白兔糖、媽咪麵同CD畀佢哋。（交換電話日後溝通？）電話費貴，交換咗MSN。」
文：影視組