容祖兒和古巨基開年飯豪擦「阿凡鮑」，寓意虎年豐衣足食。稱霸樂壇的祖兒被指臉大食四方，希望今年強攻電影圈，一箭雙鵰。剛榮升時裝店老闆的基仔則大計多多，除了會出三張唱片外，更希望多開三間分店搵大錢，又揚言不排除閃電結婚，看來基仔有機會在虎年做「老襯」！
祖兒和基仔齊齊開年，獲御廚楊貫一親自招呼大擦$26,880鮑翅餐。基仔夾起吉品鮑時興奮地說：「嘩！『阿凡鮑』，好3D。」祖兒則大呼：「好遺憾呀！我唔記得帶媽咪嚟食。（屋企食開年飯係咪好豐富？）一啲都唔豐富，試過有年攝到時間返屋企開年，臨時開罐頭加餸咋！不過最緊要都係一家人齊齊整整。」
祖兒更加愛自己
祖兒獲一哥激讚臉相食四方，即沾沾自喜說：「一哥識睇相，佢話我臉夠食四方，自己一直視大臉為缺陷，點知原來自己唔識貨，今日開始我會鍾意自己多啲。」祖兒還當面向基仔討利是：「『一哥』古巨基會唔會派利是？」怎料基仔卻說：「一哥（楊貫一）喺度，今日呢個場係佢。」令祖兒空歡喜一場。
問基仔是否不派利是？他說：「梗唔係，年年都畀，今年仲好重手，預計派五位數。」他對牛年的發展很滿意，剛榮升時裝店老闆的他踏入虎年更大計多多：「希望開三間分店，演藝事業就交晒畀英皇，我非常有信心！今年預計出兩張廣東、一張國語碟。（咁多？）公司覺得我啲碟好聽囉，哈哈！」
基仔自度gag聯
對於大家最關心的感情生活，基仔鬼馬地說：「依家畀工作包圍。（幾時結婚？）未到呢個心理階段，不過唔可以講咁實，有時啲嘢冇人知，冇得計算，將來結婚可能閃電結婚。」基仔還自度一對「gag聯」送給自己：「本人好有事業心，婚姻大事慢慢斟。」說罷即哈哈大笑。
祖兒於虎年亦滿肚密圈，她說：「自己今年卅歲嘞，踏入人生新階段，以前一心一意做歌手，拍戲未得到好滿意成績，係時候進軍影壇。」記者笑她在樂壇攞夠獎，是否想染指影壇獎項？祖兒即高呼：「我對唱歌仲有雄心壯志，好似火山咁，雄心勃勃，未攞夠㗎，只係想試吓做戲，希望喺隨意、冇壓力下完成。（目標係咪做影后？）暫時首要係導演對我有信心先。」
採訪：音樂組
攝影：鄭家俊
場地：阿一海景飯店