千億遺產案昨日判決，以龔仁心為首的華懋慈善基金勝訴，陳振聰（Tony）輸了官司表示會上訴。龔如心契女Gigi正身在日本公幹，當她在電話中得知陳振聰會上訴，表示是意料中事。

龔如心與陳振聰的親密關係，未料搞到滿城風雨。

陳振聰

件事變世界笑話

對於這場爭產官司，陳振聰公開了與龔如心的關係，Gigi心裏一直不好受，既傷心又難過，她說：「如果契媽生前想攞私人事出嚟講，佢一早做咗，對Tony我冇乜comment，佢上訴亦預咗，但華懋對香港貢獻好大，官司hold住太耐都唔好，好多行政上嘅嘢想做都做唔到。（你點睇件事？）我好嬲佢將契媽嘅私人事攞出嚟講，好似『鞭屍』咁，人都走咗，唔係咁好！佢同契媽生前係好朋友，如果真係錫一個人，人死咗將最親密嘅嘢攞嚟講，而且講完一次，上訴又會再講一次，佢係咪咁有把握，或者有更有力嘅證明去贏呢單官司？我好痛心亦好憤怒，佢將件事變成世界笑話，成為人哋茶餘飯後嘅話題，敗壞契媽名聲。」

為面子攞番個彩

若贏了官司，將擁有龔如心的千億遺產，Gigi會否覺得陳振聰因財而打官司？她說：「錢可以令人做出好多恐怖嘅嘢出嚟，我覺得今次唔只係為錢，有一億同十億都係咁使，可能為啖氣、為面子，贏咗可以攞番個彩。Tony佢係聰明人，佢好有本事，有能力建立自己嘅風水王國，但對呢件事有少少走火入魔，我一諗起佢公開契媽嘅私事就傷心。」

而Gigi媽咪姚煒對於這官司以「肉酸」來形容：「人都死咗仲攞啲私人嘢出嚟講，搞到聲望、名譽都冇晒，都唔知點解啲人要咁做？我覺得件事對社會影響都唔好，依家啲後生一輩係咪覺得錢最重要，連面子、觀念都可以唔要，係好負面嘅教材，佢自己都有家庭，將私人嘢講出嚟，研究咩對佢先係最重要，係咪為錢乜都可以做？」 文：名人組