昨日杜汶澤與老婆田蕊妮到長者屋作探訪，跟公公婆婆談天說地之餘，還與他們大玩小遊戲，共度愉快周末。
杜汶澤（阿澤）和田蕊妮昨出席由東方日報慈善基金、太陽報愛心基金及保良局合辦的《關懷長者心》地區安老服務計劃，到何文田常樂邨長者屋探訪老人家。活動上，阿澤、田蕊妮及保良局總理李德剛跟一眾長者玩遊戲及大派禮物。其中一個貼紙遊戲，阿澤兩公婆跟一班公公婆婆夾手夾腳用紙條貼出「身體健康」四字，祝福長者身體健康。
婆婆好客請食糖
之後兩人再到長者屋探訪，其中一個婆婆於七二年由內地來港工作，一轉眼便卅八年，剛巧阿澤亦於七二年出世，與婆婆頗為有緣。另一位婆婆十分好客，與自稱「澤仔」的杜汶澤十分好傾，又捉實田蕊妮大讚她靚女，之後又拿出許多喉糖送給兩人。
大讚活動有意義
完成探訪之後，阿澤與田蕊妮均指今次活動很有意義，見到公公婆婆玩得如此開心，他們都很高興。杜汶澤表示：「其實老人家根本唔需要乜嘢物質，只要有人嚟探吓佢哋、同佢哋傾吓偈已經好開心。我覺得香港人實在太忙碌，每日營營役役有時都唔知為乜，所以我覺得有時間好應該多啲參加呢類探訪活動。當然冇可能日日做啦！但係一星期甚至乎一年做一次都好，同啲公公婆婆傾吓偈、玩吓，佢哋開心自己都一樣開心。」
文：影視組