志偉喺圈中出名朋友多，好似最近佢為無綫開拍嘅賀歲片《72家租客》咁，除咗有張學友同袁詠儀呢啲大卡士孭飛外，仲搵咗唔少圈中好友幫手客串。不過人多自然是非多，呢頭講完袁詠儀同佘詩曼因為戲份問題唔多啱key，嗰頭又話部戲超時超支。

樂仔見志偉個愁樣即出言安慰。	佘詩曼與袁詠儀傳不和，令志偉頭痛。（資料圖片）	放大圖片

頂唔順爆大鑊

一向順得人嘅志偉都頂唔順喺記者會上呻，話戲中演員只收到「無言感激」呢四字真言嘅利是，希望班演員以後可以收番應有嘅片酬。

葉蘊儀聽唔明

雖然戲就拍完，但志偉似乎仲未煩完！早幾晚八太就見佢同成班好朋友余文樂、葉蘊儀，去咗谷祖琳大坑間糖水舖歎糖水潤一潤。

不過八太就見到志偉全程冇乜笑容，坐低冇耐仲捉住葉蘊儀係咁大吐苦水，初時葉蘊儀都好專心咁聽志偉呻，點知就愈聽愈「抓」頭。志偉見佢講極都唔多有反應，又捉住啱啱坐低嘅余文樂再講一輪，雖然樂仔已不停安慰志偉，但見佢依然都係苦口苦面。八太見到平時哈哈笑嘅志偉，為咗部戲咁煩惱，睇怕佢就算食多幾碗糖水，都係順唔番條氣！