陳偉霆（William）跟Angelababy之戀情，似有還無，昨日，William為無綫節目錄影大談「性經」，指自己已「紮起」，跟Baby是朋友，並無性關係，但在劃清界線之同時，又為女方澄清緋聞，還指是對方主動向他解畫，拿緋聞來激他，關係認真撲朔迷離！
陳偉霆（William）近期言論愈來愈大膽，繼早前自爆19歲失身，惹來「第一次」給了Baby之揣測後，昨日，他跟歐陽靖（MC Jin）、林盛斌（Bob）為J2台節目《兄弟幫》錄影，並大談「處男」及性話題，William指因覺得朋友之中，張致恒（Steven）「經驗」最豐富，所以邀對方任嘉賓；Steven亦「不負眾望」坦承自己已「紮起」兩年，暗指沒有性行為，William亦表示相信，並大談自己的「性論」，自言不會刻意「紮住」，一切順其自然，但他說：「不過我呢排都紮緊。（紮咗幾耐？）好長時間。（你有冇試過一腳踏兩船？）自己唔容許。（如果對方一腳踏兩船？）會好傷心，盡量挽救。（如果對方未揀定？）咁我會放棄。」
冇一腳踏兩船
早前有傳Baby情傾avex老闆松浦勝人，問陳偉霆覺得女方是否處於一腳踏兩船的情況，他即替Baby講說話，並表示：「想澄清Baby唔係有第三者，同佢一路keep住係朋友，佢同日本經理人嘅新聞係假。（你點知？）佢主動同我講。（佢用呢啲報道激你？）係……唔知，佢絕對唔會用呢啲嚟激我。（你哋依家咩關係？）朋友。（以前呢？）都係朋友關係。（咁有冇性關係？）冇。」
Baby強顏歡笑
這邊廂陳偉霆挺身為Baby澄清緋聞，那邊廂Baby未知是否被近期傳聞困擾，日前，她於灣仔工作後離開時，即使獲十名「龍友」歡迎團團圍着拍照及索簽名，但她都只有強顏歡笑，心情認真麻麻。
另外，William甚受廣告商歡迎，最近更為國際知名隱形眼鏡品牌ACUVUE擔任今年首位星級代言人，日前他為品牌拍特輯，更教四位徒弟跳舞技巧，William指好早以前已戴隱形眼鏡：「我試過去表演跳舞，因為驚fing甩眼鏡，所以就選擇唔戴，點知台上面有個大窿，我差啲跌咗落去，嗰次真係嚇到我好驚，之後媽咪就帶我去配隱形眼鏡，真係舒服好多。」
文：影視組