在娛樂圈打滾多年的伍詠薇（伍姑娘），承認入行初時非常懶惰，陋習多多，曾因為遲大到而被前輩級司儀公開侮辱，令她痛改前非，珍惜所有機會。
伍姑娘在劇集《美麗高解像》中，飾演一名專蝦新人的前輩級花旦。現實中，伍姑娘自爆入行初期，因遲到而被前輩級司儀公開教訓，雖然令她感到侮辱，不過事件令她立下決心戒除遲到陋習。
善待後輩
承認以前很懶惰的伍姑娘說：「記得有次出席大騷綵排，我遲到十五分鐘，有前輩喺台上對稿嘅時候知道我遲，佢叫工作人員叫我唔使嚟，個個以為佢講晦氣說話。點知當我到場時，佢大大聲眾目睽睽下叫我走！雖然我係錯，不過唔使咁嘅！但係嗰次之後，我嘅遲到陋習真係改善咗好多，成個人勤力晒。」由於入行初期受過前輩不禮貌對待，所以當伍姑娘「升呢」做前輩之後，對後輩演員定必善待。
容易虛榮
入行多年的伍姑娘，舉腳贊成認為娛樂圈是大染缸：「娛樂圈好易令人變得虛榮！記得我入行初期，賺錢就係為咗搏命買衫，啲錢經常用凸！嗰時冇得食，都要買靚衫死充，其實係人都會有虛榮心，不過唔可以多，要識得控制，唔可以畀金錢沖昏頭腦。」
文：影視組
場地：EL CID
髮型：Van Chan@hair
化妝：Davina@Beauty tech