珍姐發火非同小可！身為無綫製作部總監的曾勵珍，昨就《蘋果日報》報道無綫劇《老友狗狗》抄襲亞視未開拍但已有劇本的同名劇而怒不可遏，因涉及創作人操守問題，珍姐為正視聽，昨午率領《老》劇監製梁材遠、編審蔡婷婷等，以高姿態急急召開記招，席上則由外事部副總監曾醒明手持《蘋果日報》發言。

曾氏稱，無綫看到此篇報道後非常震怒，因有感相關說法對同事不公平，現交由法律部門去信《蘋果》跟進，曾氏續稱此報道對無綫信譽有影響，可能令廣告商有另外睇法，故需澄清，目前以「聽其言，觀其行」態度去處理。

受傷害難啃「罪名」

會上珍姐愈講愈着火，她坦言看完報道很嬲，並已翻查資料證實該劇是○七年五月已存在，當年劇名為《好狗出更》，為編審蔡婷婷個人構思。珍姐說：「大家用心用力做，依家畀人砌成『竊取』罪名，講到好似做賊偷人嘢咁，好大傷害，我哋同傳媒關係唇齒相依，以前有類似嘢，但有娛樂成分都可以接受，但今次指控嚴重，好難啃得落，對同事好大侮辱，有冇搞錯！」問可有睇過亞視《老》劇？珍姐嬲爆說：「佢哋拍咗出嚟咩？畀個天書、橋段同故事大綱我睇吖！有（構思）點解唔拍呀？（有傳冇錢開拍？）個古仔係我哋三個腦諗出嚟嘅，（有暗示係創作人操守問題？）邊個員工吖？叫佢講個名出嚟！」

蔡婷婷委屈欲哭

珍姐席上多次力撐同事用心創作，同場的編審蔡婷婷狀甚委屈，幾乎想哭，珍姐指蔡為無綫十多年員工，她說：「唔通十幾年前就抄呀？」委屈不堪的蔡婷婷接着說：「我○五年開始養狗，構思係想將正確養狗訊息畀觀眾，所以提議畀材叔（監製梁材遠），再開始籌備。拍狗題材好難，故搵受過訓練嘅警犬，過程唔係抄襲，係抄就係抄自己同隻狗嘅經歷，今次我覺得好侮辱，呢啲係創作人心血，不明不白負上罪名好傷害，要攞番個公道同清白！」

文：影視組