熊黛林（Lynn）乃模特兒界紅人，但於電影圈卻是新丁一名，加上不諳廣東話，在新片宣傳上慘成獨孤精，眼見一眾演員有說有笑，自己卻完全「搭唔到嘴」，非常冇癮！
Lynn、古天樂、吳君如及鄭中基等昨日為電影《花田囍事2010》宣傳，影壇新人Lynn大部分時間均表現沉默，與其他演員寫揮春及搓湯圓時亦未有多作交流，期間Lynn站於君如與田蕊妮中間，後兩者不斷閒談，Lynn卻未能搭嘴，只能傻笑遮掩尷尬情況。
肥仔聰搶住解圍
活動後Lynn跟鄭中基及林子聰一同受訪，Lynn直言：「佢哋兩個成日都笑，其實我有啲都聽唔明，廣東話未至於好成咁。」談到她於台上與其他人鮮有交流，鄭中基及肥仔聰已搶住為Lynn解圍說：「唔係，係佢高得滯，所以今日專登要佢着平底鞋。」Lynn聞言不斷掩嘴而笑，及後才說：「我都鍾意平底鞋，其實我一望佢哋對眼就好想笑，驚忍唔住，所以唔敢同佢哋講嘢！」
君如做集咀女星
對於有指無綫藝員以友情價拍公司電影，尚欠無綫廿集電視劇的古仔未有回應，反而着身旁的田蕊妮回答，笑言：「你依家拍緊無綫劇。」但阿田就謂：「點答呀？總之拍得開心最重要。」
至於片中與黃百鳴有一場咀戲的君如，笑指為達搞笑效果，該場戲要對百鳴「施刑」叉頸及插眼，更抵死謂：「我都係集咀女星，連唔應該咀嘅都咀埋，今次係百鳴銀幕初吻！」
有此一著
模特兒出身的Lynn擁有衣架身形，幾乎甚麼剪裁的服裝也難不倒她，昨日她穿上Diane Von Furstenberg品牌背心裙亮相，鋪滿黑白膠片的裙子，散發另一種性感美。
文：影視組