三哥苗僑偉和太太戚美珍前晚在中環一間餐廳慶祝結婚20周年，曾志偉、湯盈盈、陳敏之、梁靖琪、黎瑞恩、Rosemary、貝安琪等半百藝人畀面到賀，佘詩曼更與三位過氣緋聞男友狹路相逢，張智霖和馬德鐘攜眷赴會，而吳卓羲則單拖現身。

據知場內十分熱鬧，一班藝人在live band伴奏下又唱又跳，飲到醉醺醺時，志偉起哄叫幾對已婚有情人Chilam和靚靚、伍詠薇和練海棠等即場嘴對嘴，三哥三嫂更要錫足兩次；不過有人歡喜有人愁，部分仍是單身的女藝人疑一時感觸，攬住三嫂喊不停。

苗僑偉和戚美珍深情一吻，慶祝結婚20周年紀念。

張智霖手持紅酒，與老婆袁詠儀到賀。

眼紅嬲爆打的

約晚上12時，陳敏之與友人先行離開，當她走到Kee Club樓下時，離遠的馬德鐘突然拔足狂奔走到敏之身邊，但敏之卻面黑黑沒有理會，之後敏之由馬德鐘太太張筱蘭陪伴下走入大廈內，約分幾鐘後，敏之雙眼帶紅兼嬲爆爆上的士，被問到是否唔開心？她說：「冇事，冇事，唔好影！」之後各人陸續離開，黎瑞恩疑飲得太多酒步履不穩，差錯腳整個人仆前雙膝落地，而Rosemary亦差點跌倒，衝口而出說：「Oh sh××！」

湯盈盈（左起）與陳敏之、佘詩曼、梁靖琪到場。	黎瑞恩離開時差錯腳仆倒車婉婉身旁，雙膝跪地，她直言非常尷尬。	車婉婉、黎瑞恩

三嫂直言感動

至凌晨三時許，三哥和三嫂壓軸離開，並應記者要求深情一吻，事後三嫂直言好感動：「三哥唔係一個浪漫嘅人，但佢為咗同我補祝生日，送花、送蛋糕兼搞派對，好開心。好多未婚嘅女仔都問我哋相處之道，原來好多女仔都會用盡方法令身邊男人開心，大家一時感觸就攬住我係咁喊。」而敏之則在電話中解釋：「我唔係喊，飲咗酒面紅紅，女仔貪靚唔想畀人影相，而馬德鐘只係想車埋我走，唔好亂諗嘢。」另外，曾與三哥傳緋聞的梁靖琪（Toby）則與父母一同到賀，Toby說：「我叫佢哋囡囡偷咗啲相畀我，用嚟製作咗一隻ＣＤ送畀佢哋，好有意思。」

文：專案組

攝：追蹤組