樂壇天后容祖兒為慈善不遺餘力，為吸引更多人捐出善款，前晚以超短熱褲上陣，又唱又跳，更與男舞蹈員大跳辣身舞，祖兒笑指動作多得似人體奧妙展！
容祖兒、陳偉霆（William）、張智霖、許志安、蘇永康、張衞健、梁漢文、官恩娜及謝雪心等，前晚出席《慈善星輝仁濟夜》活動，其中祖兒更與師弟William一起表演勁歌熱舞，籌得60萬元善款。
拉晒筋做一字馬
祖兒在唱新歌《桃色冒險》時施展渾身解數，與男舞蹈員大跳辣身舞，更做出一字馬及拗腰等高難度動作，非常賣力。
祖兒於表演前已向記者透露會有性感演出，更笑言：「啲動作多到好似人體奧妙展咁，之前已經拉晒筋，啲舞步都幾sexy㗎，會有撫摸、一字馬嗰啲性感動作，我綵排時都幾尷尬。」
談到傳媒大獎，問她若陳奕迅（Eason）缺席無綫的頒獎禮，會否令她有更大機會？祖兒說：「可能佢心情好又會嚟呢，到時自有分曉，好多嘢估唔到嘅！」
不認同攞獎麻木
而早前徐濠縈曾指老公Eason攞獎攞到麻木，祖兒聞言後表示：「唔會嘅，我同佢都係事業心重，希望人認同。（你有冇麻木？）皮膚就有麻木，我麻木依家都見唔到我啦！」
至於William則表示將會放假數天到泰國出席家姐的婚禮，問到緋聞女友Angelababy會否同行？他說：「唔會，冇可能！（Baby送咩畀你家姐？）希望佢喺正式擺酒時會到。」
文：影視組